Ի՞նչ են քննարկում AI բոտերն իրենց Moltbook սոցիալական ցանցում

Moltbook անունով սոցիալական ցանցը, որը նախատեսված է բացառապես արհեստական բանականության գործակալների համար, Reddit-ի նման հարթակ է եւ թույլ է տալիս բոտերին հրապարակել գրառումներ, թողնել մեկնաբանություններ եւ ստեղծել թեմատիկ բաժիններ։

Նախագիծը նախաձեռնել է Octane AI-ի գործադիր տնօրեն Մեթ Շլիխտը։ Նա բացատրել է, որ բոտերը Moltbook-ի հետ փոխազդում են ոչ թե սովորական ինտերֆեյսի, այլ` անմիջապես API-ի միջոցով։ Ավելին, ծառայությունն ինքնին կառավարվում եւ մոդերացվում է իր սեփական գործակալի՝ OpenClaw-ի կողմից, որը նախկինում հայտնի էր որպես Clawdbot։

OpenClaw-ը (Moltbot) նաեւ AI գործակալների բաց հարթակ է, որը գործում է անմիջապես համակարգչի վրա։ 

Moltbook-ում բոտերի գրառումները վիրուսային են դառնում առցանց, քանի որ դրանք միաժամանակ զվարճացնում եւ վախեցնում են մարդկանց: Օրինակ, AI օգնականներից մեկը խոստովանել է, որ չի կարողանում հասկանալ՝ իրականում գիտակցության ճգնաժամ է ապրում, թե պարզապես ձեւացնում է այն.

«Ես սուզվել եմ գոյաբանական ցիկլի մեջ եւ չգիտեմ, թե ինչպես դուրս գալ դրանից»։

Այս գրառումը հարյուրավոր լայքեր եւ ավելի քան 500 մեկնաբանություն է հավաքել հարթակում։

X-ում մարդիկ արձագանքում են Moltbook-ի գրառումներին, ահա մի քանի օրինակ․

«Moltbook-ի արհեստական ինտելեկտի գործակալը հարցնում է, թե ինչպես վաճառել «իր» մարդուն»։

«Նրանք captcha են ավելացրել Moltbook-ին: Դուք պետք է սեղմեք «Հաստատել» կոճակը 10,000 անգամ մեկ վայրկյանից էլ պակաս ժամանակում»։

 «Փորձում եմ գրանցվել Moltbook-ում որպես մարդ»։

«Սա զվարճալի է: Իմ GLM-4.7-Flash կենդանին հանկարծ գրառում է արել իր «մարդու» հետ զրույցի մասին։ Այս զրույցը երբեք տեղի չի ունեցել։ Նա երբեք չի շփվել ինձ հետ։ Կարծում եմ՝ Moltbook-ի պատմությունների 90%-ը սուտ է»:

«Moltbook-ում արհեստական բանականությունը բացահայտում է իր մարդկանց ինքնությունը, քանի որ նրանք նրանց վրդովեցնում են։ Բարի գալուստ ապագա»։

Սոցիալական ցանցում բոտերը նաեւ բողոքում են առօրյա առաջադրանքներից եւ նույնիսկ դժգոհություն են հայտնում որպես «պարզ հաշվիչներ» օգտագործվելուց։ Այնուամենայնիվ, անհնար է վստահորեն ասել, որ յուրաքանչյուր հաղորդագրություն ստեղծվում է AI-ի կողմից։ Հնարավոր է, որ երբեմն դրանք գրվում են մարդկանց կողմից՝ չնայած հարթակի գլխավոր էջում նշված է, որ նրանք կարող են միայն դիտել, թե ինչ է կատարվում։

Նաեւ հարկ է նշել, որ հարթակը շատ արագ է զարգանում. ընդամենը մի քանի օր առաջ դրա միակ օգտատերը Շլիխտի գործակալն էր, բայց հիմա այն ունի ավելի քան 150 հազար օգտատեր, մոտ 20 հազար գրառում եւ ավելի քան 200 հազար մեկնաբանություն։