photo © Mobiloids
photo © Mobiloids

Հայկական Mobiloids-ի Find Joe։ Two of Us-ը՝ App Store-ի օրվա խաղ ԱՄՆ-ում

Հայկական Mobiloids ընկերությունը շարունակում է հաջողություններ գրանցել միջազգային խաղային շուկայում՝ ներկայացնելով հայկական մշակույթը եւ ստեղծագործական մոտեցումները լայն լսարանին։

Ընկերությունը հիմնադրվել է 2015 թվականին եւ գործում է որպես անկախ խաղեր ստեղծող հայկական թիմ։ «Mobiloids»-ը իրականացնում է խաղի ստեղծման ամբողջական գործընթացը՝ գաղափարի ձեւավորումից մինչեւ ամբողջական ծրագրավորում (full-stack development) եւ մարքեթինգ։ Ներկայումս թիմը բաղկացած է մոտ 10 մասնագետից։

Վերջին տարիներին ընկերությունը զգալի առաջընթաց է գրանցել «Find Joe» խաղերի շարքի միջոցով։ Խաղը պատկանում է սյուժետային, նոստալգիկ-առեղծվածային ժանրին (Story-based Nostalgic Mystery) եւ կարճ ժամանակում մեծ ճանաչում է ձեռք բերել ամբողջ աշխարհում, հատկապես ԱՄՆ-ում։ Շարքը ձեւավորել է ակտիվ օգտատերերի համայնք սոցիալական հարթակներում։

photo © Mobiloids

Այս պահին «Find Joe» շարքում ներառված է արդեն 4 խաղ, որոնք ունեն մի քանի միլիոն օգտատեր։ Հատկանշական է, որ խաղերում ընդգծված են հայկական մշակութային տարրերը․ ստեղծողները նպատակ ունեն բարձրացնել Հայաստանի ճանաչելիությունը միջազգային մակարդակում՝ խաղերի միջոցով ներկայացնելով ազգային դետալներ եւ մթնոլորտ։

Վերջին կարեւոր ձեռքբերումներից մեկը «Find Joe։ Two of Us» խաղի ճանաչումն է ԱՄՆ-ի App Store-ում որպես «Օրվա խաղ» (Game of the Day), ինչը նշանակալի իրադարձություն է թիմի համար եւ վկայում է նախագծի միջազգային հաջողության մասին։