Microsoft-ը ներկայացրել է Project Solara օպերացիոն համակարգը` Android-ի հիմքով

Microsoft-ը ներկայացրել է Project Solara-ը՝ Android-ի հիման վրա ստեղծված հարթակը, որը նախատեսված է AI գործակալների (AI agents) աշխատանքի համար։

Ընկերությունը նաեւ ցուցադրել է երկու կոնցեպտային սարք՝ AI-ով աշխատող սեղանի էկրան եւ «խելացի» բեյջ աշխատակիցների համար, սակայն չի նախատեսում դրանք արտադրել։

Microsoft-ը Project Solara-ն անվանում է «զրոյից ստեղծված հարթակ՝ գործակալային սցենարների ապահովման համար», գրում է The Verge-ը։ Այն ներկայացվել է Build 2026 համաժողովում։

Project Solara-ն կառուցված չէ Windows-ի հիման վրա, այլ հիմնված է Android-ի վրա, ինչը թույլ է տալիս օպերացիոն համակարգին աշխատել ավելի քիչ էներգիա սպառող սարքերում։

Microsoft-ը ցուցադրել է նաեւ երկու կոնցեպտային սարք, որոնք կարող են աշխատել Project Solara-ի վրա։ Առաջինը AI-ով աշխատող սեղանի էկրան է, որն արտաքին տեսքով հիշեցնում է Amazon Echo Show կամ Google Nest Hub սարքերը։

Երկրորդ կոնցեպտը աշխատակիցների համար նախատեսված բեյջ է՝ տեսախցիկով, մատնահետքի սկաներով, Wi-Fi-ով, Bluetooth-ով եւ սենսորային էկրանով։ Ըստ Microsoft-ի՝ նման սարքը կարող է մեկ սեղմումով գործարկել AI գործակալ, ձայնագրել եւ սղագրել խոսքը, ինչպես նաեւ տեսախցիկի միջոցով «տեսնել» այն, ինչ տեսնում է օգտատերը։

Միեւնույն ժամանակ, Microsoft-ը չի նախատեսում ինքնուրույն թողարկել այս սարքերը․ դրանք ներկայացվել են որպես ռեֆերենսային դիզայններ, որոնք այլ ընկերություններ կարող են իրականացնել Project Solara-ի հիման վրա։

Microsoft-ի տվյալներով՝ Project Solara-ի հիման վրա փորձնական նախագծեր արդեն մշակում են AccuWeather, Best Buy, CVS Health եւ Target ընկերությունները։