ChatGPT-ն սկսել է օգտագործել տարիքի կանխատեսման գործիքը

OpenAI-ն սկսել է օգտագործել գործիք՝ ChatGPT օգտատերերի տարիքը կանխատեսելու համար։

Նրանց, ում համակարգը կհամարի անչափահաս, կսահմանափակվի զգայուն թեմաներով երկխոսությունների հնարավորությունը։

Ֆունկցիայի ներդրման մասին ընկերությունը հայտնել է բլոգում։ Համակարգը կհետեւի ChatGPT օգտատերերի վարքագծին՝ նրանց մոտավոր տարիքը որոշելու համար։ Նեյրոցանցը կվերլուծի տարբեր «ազդանշաններ», որոնք կարող են օգնել տարիքի որոշմանը, այդ թվում՝ հաշվի գոյության տեւողությունը եւ օրվա այն ժամերը, երբ օգտատերն առավել ակտիվ է։

Եթե կանխատեսման մոդելը որոշի, որ օգտատերը 18 տարեկանից փոքր է, ChatGPT-ն ավտոմատ կակտիվացնի ֆիլտրեր, որոնք կսահմանափակեն զգայուն թեմաներով զրույցները՝

•    բռնություն եւ դաժանություն,
•    վտանգավոր վարքագիծ,
•    սեռական կամ դաժան դերախաղեր,
•    ինքնավնասում,
•    ծայրահեղ գեղեցկության չափանիշներ,
•    անառողջ դիետաներ։

Օգտատերերը, որոնց համակարգը սխալմամբ կհամարի անչափահաս, կկարողանան հաստատել իրենց տարիքը Persona ինքնության վավերացման ծառայության միջոցով։ Դրա համար անհրաժեշտ կլինի բեռնել սելֆի լուսանկար։