Epic Games-ը կազատի 1000 աշխատակցի

Epic Games-ի գործադիր տնօրեն Թիմ Սուինին հայտարարել է 1000 աշխատակցի վրա ազդող լայնածավալ կրճատումների մասին։ 

Նրա նամակը հրապարակվել է ընկերության պաշտոնական կայքում։ Կրճատումները տեղի կունենան Fortnite խաղացողների ակտիվության անկման ֆոնին, որը սկսվել է 2025 թվականին։

Reuters-ի տվյալներով՝ կրճատումներից տուժած աշխատուժի տոկոսը պարզ չէ։ Նշվում է, որ սա ընկերությունում կրճատումների երկրորդ խոշոր փուլն է վերջին երեք տարվա ընթացքում. 2023 թվականի սեպտեմբերին Epic Games-ը կրճատել է իր աշխատուժի 16%-ը՝ մոտ 900 մարդ, ըստ Bloomberg-ի։

Սուինիի խոսքով՝ լսարանի հետաքրքրության կորուստը առցանց մարտական խաղի նկատմամբ հանգեցրել է նրան, որ Epic-ը «ծախսում է զգալիորեն ավելի շատ, քան վաստակում»։ Հայտարարված կրճատումներից, կապալառուների վերանայումներից, մարքեթինգային ծախսերից եւ որոշ թափուր աշխատատեղերի լրացումից 500 միլիոն դոլարի խնայողությունները թույլ կտան ընկերությանը կայունացնել իր ֆինանսական դիրքերը։ 

Գլխավոր տնօրենը նշել է, որ ընկերության ներկայիս վիճակի վրա, ի թիվս այլ բաների, ազդել են նախորդ սերնդի համեմատ խաղային համակարգերի վաճառքի ցածր մակարդակը եւ խաղային շուկայում առկա լարված մրցակցությունը։

Թիմ Սուինին նշել է, որ կրճատումները կապված չեն մշակողներին արհեստական բանականությամբ փոխարինելու հետ։ Այնուամենայնիվ, Epic Games-ը գիտակցում է, որ նման տեխնոլոգիաների օգտագործումը կարող է բարելավել աշխատակիցների արտադրողականությունը եւ ցանկանում է որքան հնարավոր է շատ հմուտ մասնագետներ օգտագործեն դրանք։

Ընկերությունը հանձնառու է բարելավել Fortnite-ը՝ ավելացնելով գրավիչ սեզոնային բովանդակություն, բարելավելով խաղը եւ անցկացնելով տարբեր միջոցառումներ։ Մեկ այլ նպատակ է արագացնել մշակողների գործիքների ստեղծումը, ապահովելով կայունություն եւ ֆունկցիոնալություն, քանի որ ընկերությունը անցնում է Unreal Engine 5-ից եւ UEFN-ից UE6-ի։

Ստեղծված իրավիճակի պատճառով կորպորացիան նաեւ կփակի Fortnite-ի Festival Battle Stage, Ballsitic եւ Rocket Racing ռեժիմները։ Առաջին երկուսը կանջատվեն 2026 թվականի ապրիլի 16-ին, իսկ երրորդը՝ հոկտեմբերին։