Ինժեներական քաղաքում դրվել է Inttegral տեխնոլոգիական կենտրոնի հիմքը

Մայիսի 20-ին Ինժեներական քաղաքում կայացել է տեխնոլոգիական նոր «Ինտեգրալ Սոլյուշնս» կենտրոնի հիմնարկեքի արարողությունը՝ ՀՀ ԲՏԱ նախարար Մխիթար Հայրապետյանի մասնակցությամբ։

«Ինտեգրալ Սոլյուշնս» ընկերության շնորհիվ Հայաստան է բերվել Siemens-ի եզակի սուպերհամակարգիչ (էմուլյատոր), որը թույլ կտա հայկական նախագծվող չիպերը թեստավորել հենց տեղում՝ նախքան արտադրությունը։

ՀՀ ԲՏԱ նախարար Մխիթար Հայրապետյանի խոսքով` նոր գերհամակարգչային կենտրոնը ծառայելու է ամբողջ ինժեներական էկոհամակարգի զարգացամանը։

«Ընկերությունը կարող է ներդրում կատարել ոչ միայն սեփական կարողություններն ու արտադրական ենթակառուցվածքները զարգացնելու մեջ, այլեւ անուղղակի ներդրում կատարել ամբողջ ոլորտի զարգացման մեջ։

Մխիթար Հայրապետյանը
photo © Մեդիամաքս

Նույնիսկ գործընկերների հետ քննարկում էինք` էմուլյատորը վարձակալության ձեւաչափով նորաստեղծ հայկական ինժեներական ընկերություններին հասանելի դարձնելը, չի բացառվում նաեւ համալսարաններին անվճար հասանելիության հնարավորությունը։ Սա ինձ համար չափազանց ոգեւորիչ իրադարձություն է»,- նշել է նախարարը։

«Ինտեգրալ Սոլյուշնս» ընկերության համահիմնադիր Էդուարդ Մուսայելյանի խոսքով՝ տեսլականը Հայաստանը AI չիպերի նախագծման տարածաշրջանային կենտրոն դարձնելն է։

Էդուարդ Մուսայելյանը
photo © Մեդիամաքս

«Այսօր վերիֆիկացիան իրականացվում է թվային մոդելավորման միջոցով՝ սիմուլյացիաների եւ գերհամակարգիչների օգնությամբ։ 90-ականներին վերիֆիկացիան ամբողջ նախագծման գործընթացի մոտ 30%-ն էր կազմում, ժամանակակից AI չիպերի դեպքում այն արդեն հասնում է 80%-ի։ Այսինքն՝ ամենամեծ մարտահրավերը դարձել է հենց վերիֆիկացիան:

Մեր Siemens Veloce գերհամակարգիչը հնարավորություն է տալիս մինչեւ արտադրություն հասկանալ չիպի բոլոր հնարավոր խնդիրները, ինչը գործընթացը դարձնում է ավելի արագ, խելացի եւ անվտանգ: Մենք ուզում ենք գնալ մեկ քայլ առաջ եւ ոչ միայն ստեղծել AI մոդելներ կամ նախագծել սովորական չիպեր, այլ հենց Հայաստանում նախագծել AI չիպեր»,- նշել է Էդուարդ Մուսայելյանը։

photo © Մեդիամաքս

«Ինտեգրալ Սոլյուշնս»-ի համահիմնադիր Արմեն Բալդրյանն էլ նշել է, որ նոր կենտրոնը նախագծված է 300-400 հոգու համար: Թիմում աշխատում են փորձառու մասնագետներ, որոնց միջին աշխատանքային փորձը շուրջ 10 տարի է եւ փորձում են աշխարհի տարբեր երկրներից ներգրավել հայ ինժեներների։

«Ինտեգրալ Սոլյուշնս»-ը դարձել է վերջին ընկերություններից մեկը, որի շինարարական աշխատանքներով կամփոփվի Ինժեներական քաղաքի երկրորդ հատվածի կառուցապատման վերջին փուլը։

Նունե Գրիգորյան
Լուսանկարները` Դավիթ Ղահրամանյանի