Ալեքսանդր Եսայանը
photo © Firebird AI
Մայքլ Դելը
photo © Firebird AI
Ռազմիկ Հովակիմյանը
photo © Firebird AI

Firebird-ի ԱԲ գործարանի բացումը նշանավորվել է նոր ներդրումների մասին հայտարարությամբ

Firebird AI ընկերությունն օգոստոսի 8-ին Հայաստանում պաշտոնապես գործարկել է իր հավակնոտ մեգանախագիծը՝ տարածաշրջանի ամենամեծ արհեստական բանականության (ԱԲ) գործարանը։

Հրազդանի մերձակայքում գտնվող մեգակենտրոնի գործարկումը ազդարարում է ընկերության գլոբալ ԱԲ հարթակի մեկնարկը՝ Հայաստանը դիրքավորելով որպես ԱԲ հաշվարկային հզորությունների ռազմավարական կենտրոն։

Firebird-ը նաեւ հայտարարել է, որ NVIDIA-ն մտադիր է ներդրում կատարել ընկերությունում՝ այս տարի CoreWeave-ի կատարած ավելի վաղ ներդրումից հետո: Կապիտալ ներդրումները կօգնեն Firebird-ին ընդլայնել իր գլոբալ ենթակառուցվածքն ու գործառնական ներկայությունը, ինչպես նաեւ ստեղծել ամենամեծ եւ ամենաառաջադեմ հաշվողական կլաստերները զարգացող շուկաներում։

«ԱԲ գործարաններն այն ենթակառուցվածքն են, որոնք անհրաժեշտ են պետություններին գիտելիք ստեղծելու, տնտեսական աճն առաջ մղելու եւ ԱԲ դարաշրջանում մրցունակ լինելու համար։ Մենք Firebird-ի հետ Հայաստանում եւ Ղազախստանում կառուցում ենք ենթակառուցվածք, ինչը հետազոտողներին, ստարտափներին եւ արդյունաբերության ոլորտներին կտրամադրի հաշվողական այն հիմքը, որն անհրաժեշտ է տեղում արհեստական բանականություն մշակելու, աշխարհից նորարարներ ներգրավելու եւ համաշխարհային ԱԲ տնտեսությանը մասնակից դառնալու համար»,- նշել է NVIDIA-ի հիմնադիր եւ գործադիր տնօրեն Ջենսեն Հուանգը:

Մեգանախագծի առաջին արդեն իսկ գործարկված փուլի ներդրումները գերազանցում են 500 միլիոն դոլարը։ Մինչեւ 2027 թվականի վերջ գործարանի հզորությունները կընդլայնվեն՝ հասնելով ավելի քան 70,000 NVIDIA Blackwell եւ Vera Rubin GPU-ների։ Նախագծի շրջանակում ԱԲ ենթակառուցվածքի հզորությունը կհասնի 300 ՄՎտ-ի, ինչի արդյունքում այն կդասվի Եվրոպայի խոշորագույն ԱԲ ենթակառուցվածքային հարթակների եւ աշխարհի ամենանշանակալի ԱԲ հաշվարկային կենտրոնների շարքին։

Կառուցված լինելով NVIDIA DSX հարթակի հիման վրա եւ միացված լինելով NVIDIA Spectrum-X Ethernet ցանցային համակարգին՝ Firebird-ի գործարանը մշակվել է ԱԲ ենթակառուցվածքների տնտեսական արդյունավետությունը բարձրացնելու նպատակով․ այն թույլ է տալիս նույն տարածքում տեղադրել մինչեւ 40 տոկոս ավելի շատ GPU-ներ եւ առավելագույնի հասցնել յուրաքանչյուր մեգավատի արդյունավետությունը։

Ընկերության ընդլայնման ռազմավարությունը դուրս է գալիս Հայաստանի սահմաններից։ Ղազախստանը դարձել է երկրորդ շուկան, որտեղ Firebird-ը «Data Center Valley»-ում ապահովել է 125 ՄՎտ ԱԲ ենթակառուցվածքային հզորություն՝ ստանալով Ղազախստանի կառավարության համապատասխան հաստատումները, ինչպես նաեւ ԱՄՆ առեւտրի դեպարտամենտի Արդյունաբերության եւ անվտանգության բյուրոյի (BIS) արտահանման թույլտվությունը։ Միաժամանակ, մի շարք այլ զարգացող շուկաներում ընթացող ծրագրերի շնորհիվ ընկերությունը նպատակ ունի մինչեւ 2028 թվականի վերջն իր ԱԲ ենթակառուցվածքային հզորությունը հասցնել 2 ԳՎտ-ի՝ ձեւավորելով աշխարհում ամենաարագ զարգացող ԱԲ ենթակառուցվածքային ցանցերից մեկը։

Ռազմիկ Հովակիմյանը
photo © Firebird AI

«Քանի որ արհեստական բանականությունը դառնում է յուրաքանչյուր ժամանակակից տնտեսության հիմնարար ենթակառուցվածքը, երկրներին անհրաժեշտ են վստահելի գործընկերներ, որոնք կարող են արագորեն ապահովել անվտանգ եւ ընդլայնվող ԱԲ հարթակներ։ Firebird-ը համադրում է իր փորձառությունը, NVIDIA-ի եւ առաջատար ենթակառուցվածքային մատակարարների հետ ռազմավարական համագործակցությունը, ԱՄՆ կարգավորող դաշտի փորձառությունն ու ընդլայնվող միջազգային ծրագրերի պորտֆելը։

Առաջիկա երկու տարիների ընթացքում ակնկալում ենք, որ մեր գլոբալ ԱԲ ենթակառուցվածքային հարթակի ընդհանուր հզորությունը կհասնի մոտ 2 ԳՎտ-ի՝ զարգացող շուկաներին հնարավորություն տալով անմիջականորեն մասնակցել համաշխարհային ԱԲ տնտեսությանը»,- ասել է Firebird-ի համահիմնադիր եւ գործադիր տնօրեն Ռազմիկ Հովակիմյանը։

Firebird AI-ի համահիմնադիր Ալեքսանդր Եսայանի խոսքով՝ վեց ամիս առաջ տարածքում պարզապես շինհրապարակ էր, իսկ այսօր այստեղ գործում է տարածաշրջանի խոշորագույն ԱԲ գործարանը, որը Եվրոպայի ամենահավակնոտ ԱԲ ենթակառուցվածքային ծրագրերից մեկի հիմքն է։

Ալեքսանդր Եսայանը
photo © Firebird AI

«Նման կարճ ժամանակահատվածում շինարարությունից մինչեւ գործարկման պատրաստվածության հասնելը վկայում է համաշխարհային մակարդակի ԱԲ ենթակառուցվածք աննախադեպ արագությամբ ստեղծելու Firebird-ի կարողության մասին։ Ավելի քան 70,000 NVIDIA Blackwell եւ Vera Rubin GPU-ների տեղակայման նախատեսվող ընդլայնման ճանապարհային քարտեզով Հայաստանը արագորեն դառնում է Եվրոպայի ԱԲ հաշվարկային կարեւորագույն ուղղություններից մեկը եւ համաշխարհային ԱԲ տնտեսության ռազմավարական կենտրոն»,- նշել է Ալեքսանդր Եսայանը։

«Արհեստական բանականության ապագան ձեւավորելու են այն կազմակերպություններն ու երկրները, որոնք կարողանում են տեսլականը վերածել իրական կարողության։ Firebird-ը ցույց է տալիս, թե ինչ է հնարավոր անել, երբ Հայաստանում ստեղծում ես արհեստական բանականության գործարան, որն ընդլայնում է տեղում ԱԲ-ի մշակման եւ կիրառման համար անհրաժեշտ ենթակառուցվածքները։

Մայքլ Դելը
photo © Firebird AI

Dell Technologies-ի ենթակառուցվածքների վրա հիմնված այս գործարանը ստեղծում է սուվերեն արհեստական բանականության ներդրման համար ամուր հիմք եւ նոր հնարավորություններ բացում նորարարության, գիտահետազոտական գործունեության եւ տարածաշրջանի տնտեսական աճի համար»,- հավելել է Dell Technologies-ի տնօրենների խորհրդի նախագահ եւ գլխավոր գործադիր տնօրեն Մայքլ Դելը։

Firebird-ը նաեւ հայտարարել է, որ իր առաջին հաճախորդներից է Perplexity-ն։ Ընկերությունը կօգտվի Firebird-ի բարձր արտադրողականությամբ ԱԲ ենթակառուցվածքից՝ իր պատասխանների որոնման համակարգի եւ արհեստական բանականությամբ աշխատող թվային գործընկեր հարթակի աշխատանքն ապահովելու համար։ Այս համագործակցությունը կարեւոր քայլ է առաջատար ԱԲ-կենտրոնացված ընկերություններին դեպի Հայաստան ներգրավելու եւ երկրի տեխնոլոգիական ու ստարտափ էկոհամակարգի հետագա զարգացումն ամրապնդելու համար։

ԱԲ գործարանի շինարարությունն իրականացվել է միջազգային բնապահպանական եւ էներգետիկ բարձրագույն ստանդարտներին համապատասխան։ ԱԲ գործարանը կարող է նպաստել Հայաստանի էներգահամակարգի առավել կայուն աշխատանքին։ Հովացման համակարգը կառուցված է փակ շրջանառության սկզբունքով, ինչը նշանակում է, որ ջուրը չի սպառվում ընթացիկ շահագործման ընթացքում եւ չի արտահոսում շրջակա միջավայր։

Առաջին փուլում Firebird AI-ի ԱԲ գործարանում աշխատելու է շուրջ 100 մասնագետ, իսկ նախագծի ամբողջական իրականացման արդյունքում Հայաստանում նախատեսվում է ստեղծել ավելի քան 300 բարձր որակավորում պահանջող աշխատատեղ։ Գործարանի հաշվարկային հզորությունները նախատեսված են սպասարկելու ինչպես տեղական, այնպես էլ միջազգային օգտատերերին։ Միեւնույն ժամանակ, հաշվարկային հզորությունների մի մասը նախատեսված է Հայաստանի էկոհամակարգի զարգացման համար։ Դրանք հասանելի կլինեն տեղական ստարտափներին, համալսարաններին, հետազոտական կենտրոններին եւ գիտակրթական նախաձեռնություններին, այդ թվում՝ ՀՀ կառավարության կողմից ֆինանսավորվող ծրագրերի շրջանակում։

Նախագծի տնտեսական արդյունավետությունն արդեն իսկ արտացոլվում է պաշտոնական ցուցանիշներում․ 2026 թվականի առաջին կիսամյակի խոշոր հարկատուների ցանկում առաջին անգամ հայտնվել է Firebird AI ընկերությունը՝ պետական բյուջե վճարելով 823 միլիոն դրամ հարկ։