Ucom-ն աջակցում է տիեզերական ճարտարագիտության զարգացմանը Հայաստանում

Ucom-ը, կարեւորելով տեխնոլոգիական կրթության զարգացումը, աջակցում է CIPR Aerospace կենտրոնի «Տիեզերք 1.0» ուսումնական ծրագրի իրագործմանը, որի մեկնարկը տրվել է Վանաձորում եւ Օձունում։ 

Նախաձեռնության նպատակն է դպրոցականների եւ ուսուցիչների համար հասանելի դարձնել տիեզերագիտությունն ու տիեզերական ինժեներական կրթությունը՝ «Դասարանից՝ ուղեծիր» գաղափարի իրագործման համար։

Ucom-ի գլխավոր տնօրեն Ռալֆ Յիրիկյանը եւ CIPR Aerospace-ի հիմնադիր տնօրեն Մարի Հրաչուհի Բողոսյանը Վանաձորի Վիկտոր Համբարձումյանի անվան թիվ 25 հիմնական դպրոցին եւ Օձունի Հովհաննես Օձնեցու անվան թիվ 1 միջնակարգ դպրոցին հանձնել են «Տիեզերք 1.0» ուսումնական փաթեթները՝ փոքր արհեստական արբանյակով, վերգետնյա կայանով, պարաշյուտով եւ գործնական ուղեցույցներով համալրված։ 

CIPR Aerospace-ի մասնագետները նախապես վերապատրաստել են դպրոցների ուսուցիչներին՝ ուսումնական փաթեթի թեմաներով։ Վերապատրաստումից հետո ուսուցիչները արդեն հնարավորություն ունեն իրական դասեր անցկացնել աշակերտների համար։

«Ucom-ում մենք հավատում ենք, որ կրթությունն ու տեխնոլոգիան միասին են ձեւավորում երկրի ապագա կարողությունները։ Ուրախ ենք այս համագործակցության մեկնարկի համար, քանի որ տեխնոլոգիական կրթության վաղ փուլերում ձեւավորվող գործնական հմտությունները դառնում են մասնագիտական առաջընթացի ամուր հիմք։ Շարունակելու ենք աջակցել այն նախաձեռնություններին, որոնք զարգացնում են նոր սերնդի տեխնոլոգիական ներուժը եւ ընդլայնում նրանց հնարավորությունները մարզերում ու մայրաքաղաքում», – նշել է Ucom-ի գլխավոր տնօրեն Ռալֆ Յիրիկյանը։

CIPR Aerospace-ը, որը հիմնադրել է տիեզերական ճարտարագիտության մասնագետ, NASA-ում ավելի քան 20 տարվա փորձ ունեցող Մարի Հրաչուհի Բողոսյանը, վերջին տարիներին մշակել է Հայաստանի առաջին CubeSat-ը, CanSat-ը եւ PocketQube-ը, ինչպես նաեւ տիեզերագիտության ու ավիատիեզերական ինժեներության ուսումնական ծրագրեր՝ դպրոցների եւ համալսարանների համար։

«Մեր նպատակն է, որ տիեզերական կրթությունը հասանելի լինի Հայաստանի բոլոր դպրոցներին՝ անկախ մարզից կամ համայնքից։ Այս փաթեթով աշակերտները ստանում են ոչ միայն տեսական գիտելիք, այլեւ իրական ինժեներական փորձ՝ արբանյակների, վերգերտնյա կայանների հաղորդակցական համակարգերի եւ տվյալների հավաքագրման տեխնոլոգիաների կիրառմամբ։ Շնորհակալ ենք Ucom-ին՝ տեխնոլոգիական կրթության հանդեպ ցուցաբերված հետեւողական աջակցության համար»,– նշել է CIPR Aerospace-ի հիմնադիր եւ տնօրեն Մարի Հրաչուհի Բողոսյանը։

Նախաձեռնությունը միտված է STEM կրթության խորացմանը, ավիատիեզերական ճարտարագիտության առաջին քայլերի ձեւավորմանը, մարզային դպրոցների տեխնոլոգիական ներուժի ամրապնդմանը, ինչպես նաեւ ապագա ինժեներների համար պրակտիկայի եւ կարիերայի նոր հնարավորությունների ստեղծմանը։